रात्र जरी लांबली काळोख माजला
सूर्य उगवणार आहे आजही आजही
किर्र किच्च जरी घुबडे घुत्कारीती
पक्षी गातील पहाटे आजही आजही
रस्ते गर्दीचे जरी असती सामसुमले
नेती तेथेच ते आजही आजही
शहर धास्तीत जरी आहे विश्रामले
वस्ती त्याच्यात आहे आजही आजही
श्वास मुखवस्त्रात जरी आशेत गुदमरले
शुभ्र मोगरा सुगन्धतो आजही आजही
स्पर्श हवेसे जरी असती दुरावले
आम्र मधुर मोहरतो आजही आजही
चार भिंतीत जगणे जरी आहे कोंडले
मन पिसाट हिंडते आजही आजही
चाकोरीत जरी सारे नियम कोंबले
कल्पना विहारते आजही आजही
नियतीच्या पटावर सोंगटीचे सरकणे
हाती नसणार आहे आजही आजही
थिरकण्यात त्या मात्र आनंदणें
आवाक्यात आहे आजही आजही
गंभीर
.jpg)
No comments:
Post a Comment