मनाचं कॉम्पूटर!

 Your brain works just like computer; so make sure you’re the only one programming it!..

-------------------------------------------------------------
थेट पंकज कोटलवारच्या लेखणीतुन – मनाचं कॉम्पूटर!
-------------------------------------------------------------

तुम्हाला माहितीये?

मन आणि कॉम्पूटर दोघांमध्ये खुप साम्ये आहेत. दोघेही प्रचंड शक्तिशाली आहेत, बुद्धिमान आहेत.

दोघांमध्ये अफाट स्मरणशक्ती आहे, तसेच कल्पनाशक्तीही आहे.

यांचा नीट वापर केल्यास प्रचंड सर्जनात्मक यांच्याकडुन काम करवुन घेता येते.

यांचा नीट वापर केल्यास प्रचंड संहार आणि विध्वंसही घडवुन आणला जावु शकतो.

एवढचं नाही तर दोघांची कार्यपद्धतीही एकदम सेम टु सेम आहे.

कॉम्पुटरचा एखादा प्रोग्रॅम लिहताना तो असा लिहावा लागतो.

----------------------------------------
इनपुट – प्रोसेस – आउटपुट
 ---------------------------------------

अगदी असंचं माणसाच्या मनाचंही आहे,

कॉम्पूटर यंत्र असल्यामुळे आपलं काम चोख करतो, पण फारचं थोडी माणसं आपलं डोक्यातल्या कॉम्पुटरचा नीट वापर करताना दिसतात.

आपल्या आजुबाजुला असे बरेचशे कॉम्पुटर बिघडलेले दिसतात.

गंमत म्हणुन त्यांच्यातले काही प्रकार सांगतो,

१) इनपुट वाईट, म्हणुन आउटपुट शुन्य –

हे कॉम्पुटर तुम्हाला सदानकदा टी. व्ही समोर दिसतील, वेड्यावाकड्या संदर्भहीन बातम्या, वर्षानुवर्ष तिथल्यातिथे रेंगाळणाऱ्या सिरीअली, हातात स्मार्टफोन मोबाईल असल्यास हे रात्रंदिवस, मुव्ही, गेम्स यांच्या जाळ्यात अडकुन पडलेले दिसतील.

काही कॉम्पुटर गावात राहणारे असतील तर चौकाचौकात पानपट्ट्यावर घोळका करुन एखाद्याची टर उडवताना दिसतील.

आपल्यापेक्षा पूढे गेलेल्या लोकांचा मनोमन द्वेष करताना दिसतील,

फेसबुक, सोशल मिडीयावर कट्टर कार्यकर्ते बनुन रोजरोज गरळ ओकताना दिसतील,

कधी हताश, निराश होवुन स्वतःच्या नशीबाला कोसताना दिसतील,

मुळचे हे मॉडेल तल्लख बुद्धीचे आणि प्रचंड उर्जा असलेल्या कॉन्फीगरेशन असलेले होते.

पण योग्य इनपुट न मिळाल्याने यांच्या आयूष्याचे वाटोळे होते, आणि शेवटी यांना भंगारच्या दुकानात जावे लागते.

---------------------------


२) इनपुट नाही, प्रोसेस नाही, फक्त आऊटपुट आहे,  –

- म्हणजे मला सगळे काही माहित आहे, मला सगळे कळते,

- हे कॉम्पूटर समोरच्याला नेमकं काय म्हणायचयं, हे समजुन घेण्याआधीच प्रतिक्रिया द्यायला उतावीळ असतात, इथेच त्यांचा घात होतो.

- ह्यांच्या आजुबाजुला असलेले लोक ह्यांना आणि ह्यांच्या निरर्थक बडबडीला टाळु लागतात.

- जगात चाललेल्या प्रत्येक घडामोडीवर कमेंट करण्याचा यांनी मक्ता घेतलेला असतो.

- ज्या लोकांशी आपला काहीही संबंध नाही, जे लोक आपल्याला खिजगिणतीत धरत नाहीत, अशा राजकीय नेत्यांविषयी, अभिनेत्यांच्या जीवनात यांना नको तेवढा रस असतो.

- कम्युनिकेशनची उत्कृष्ट क्षमता असणारे हे लोक, पण वर्तमानपत्रे, न्युज चॅनेल आणि फेसबुक व्हॉटसएप च्या सापळ्यात इतक्या अलगद अडकतात, की आपल्या जीवनाचं मुख्य ध्येय विसरुन नको नको त्या मुद्द्यांवर आपली पुर्ण उर्जा खर्च करतात.

- सगळ्या राजकीय पक्षांनाही आपल्या प्रचारासाठी अशाच लोकांची तर गरज असते.

- माणसानं आपल्याला कोणी मुर्ख बनवु नये, इतकं शहाणं तर असायलाच हवं!..

---------------------------

३) इनपुट आहे, पण आऊटपुट नाही, कारण प्रोसेसरच बिघडलाय. –

- हे कॉम्पूटर शांतपणे ऐकल्याचा आव आणतात, पण ऐकतात आणि सोडुन देतात!

- विचारांना आपल्या आत खोलवर कधीच रुजु देत नाहीत, चिंतन नाही, मंथन नाही.

- हे तसे निरुपद्रवी प्राणी असतात, पण म्हणुनच ते आहेत तिथल्या तिथे घुटमळत राहतात,

- यांना स्वतःचं असं ठाम मत नसतं, त्यामुळे ते कोणाला प्रभावित करु शकत नाहीत.

- कसलीही भव्य स्वप्ने नसल्यामुळे कुठल्याही कामात स्वतःला झोकुन द्यायला यांना जमत नाही.

- चौकटी मोडुन संघर्ष करण्याची यांना भीती असते.

- एखादा चांगला प्रोग्रॅम यांचं आयुष्य बदलवण्यासाठी पुरेसा असतो.

---------------------------

४) व्हायरस, बग्ज आणि लॅग्ज यांच्यामुळे स्लो झालेले कॉम्पुटर –

- हे कॉम्पुटर पुर्णपणे व्यसनांच्या आहारी गेलेले असतात.

- चहा, दारु, सिगरेट, सुपारी, अतिखाणे, अतिवासना, अतिबडबड, सोशलमिडीयाचा अतिवापर, अतिभांडण, निराशा ह्यापैकी कोणाताही एक व्हायरस, चांगल्यात चांगल्या आणि उत्तम सिस्टीमची वाट लावायला पुरेसा आणि सक्षम असतो.

- मुळचे हे तल्लख बुद्धीचे आणि क्षमतावान, उर्जावान लोक होते, पण एका सुक्ष्म व्हायरसने यांचा घात केलेला असतो.

- ह्यावर फॉर्मॅटींग हाच एकमेव आणि जालीम उपाय शिल्लक राहतो.

- ध्यान आणि अध्यात्मिकता हेच सर्वोत्कूष्ट फॉर्मॅटींग आहे.

---------------------------

५) उत्तम इनपुट, उत्तम प्रोसेस, अतिउत्तम आउटपुट –

- हे तुम्ही आणि आम्ही!

- उत्तम पुस्तके वाचतात, मनाची आणि शरीराची काळजी घेतात,

- पेरलं तेच उगवतं हा आकर्षणाचा नियम ह्यांना माहित असतो.

- नियमित प्रयत्नपुर्वक कृतीने जगाला थक्क करणाऱ्या अचिव्हमेंटस करुन दाखवतात.

- जिकडेतिकडे ह्यांचा बोलबाला असतो.

---------------------------------------------------------------------------------------

विनोदाचा भाग सोडा.

कित्येकदा आपण ही नकळत आपल्या मनावर एक प्रोग्रॅमिंग करुन घेतलेली असते.

जसं की,

“मी हा असा आहे!”

“हे मी सहज करु शकतो.”

“नाही, हे मला जमण्यासारखं नाही, हे खुप अवघड आहे.”

“ही तर माझ्यासाठी अशक्य कोटीतील गोष्ट आहे.”

“ही माझी विकनेस आहे.”

“पॉझीटीव्ह विचारांचा परिणाम माझ्यावर थोडावेळ टिकतो, पुन्हा मी मुळपदावर येतो.”

“माझं ना, असं आहे, ‘कळतयं पण वळत नाही,’”

“मी प्लानिंग मोठमोठी करतो, शेवटी तोंडावर आपटतो.”

“मी आरंभशुर आहे. सुरुवात जोरदार करतो आणि शेवटी ढेपाळतो.”

वगैरे, वगैरे!

अजुन तुम्हाला हवी ती वाक्ये एड करा.

पण आनंदाची गोष्ट ही आहे की, हे म्हणणारे, स्वतःशी ठरवणारे खरे तुम्ही असे नाहीत.

त्या हत्तीच्या पायात बांधलेल्या साखळीसारख्या ह्या फक्त समजुती आहेत,

खरे तुम्ही तर वेगळेच आहात.

तुम्ही अनंत, अमर्याद आणि महाप्रचंड शक्तीचा स्त्रोत सोबत घेऊन जन्माला आला आहात.

त्या शक्तीला जागृत करा,

त्या शक्तीला अनुभवा,

शक्तीशाली असल्याचं नाटक करा,

आणि जग तुमच्यापुढे झुकत आहे, याचा तुम्हाला प्रत्यय येईल.

----------------------------------------------------------------------

एकाने मला प्रश्ण विचारला, सर, भरघोस कमाई वाढवण्यासाठी नेमकं काय प्रोग्रॅमिंग करावं लागेल?

१. वाहन बदला. –

- समजा, तुम्ही एका बसमध्ये बसला आहात,

- तुम्हाला अमेरीकेला जायची इ्च्छा आहे, तर काय करावं लागेल?

- आधी त्या बसमधुन खाली उतरावं लागेल,

- मग विमानतळ गाठावा लागेल,

- मग अमेरीकेला जाणार्‍या विमानात बसावं लागेल,  

- आता नव्यान्नव टक्के चान्स आहे, अमेरीकेचा, एक टक्का अपघाताचा!

लॉ ऑफ अट्रॅक्शन अजुन वेगळं काय असतं?

सर, माझी महीना सत्तावीस हजार रुपयांची नौकरी आहे, मला पाच कोटी रुपये मिळवायचे आहेत, कसे मिळतील?

सत्तावीस हजार रुपयांचा नौकरीची बस तुला पाच कोटीच्या देशात घेऊन नाही जाणार दादा!

तुला त्यासाठी व्यवसायाच्या विमानात बसुन उड्डाणच करावं लागेल ना!

“मग सर, नौकरी सोडली तर घरच्या जबाबदाऱ्यांचं काय करु?”
“नौकरी करता करता मी बिजनेस करु शकत नाही.”
“माझी स्वप्न पुर्ण होत नाहीत, मग अस्वस्थता येते,”

म्हणजे तुम्हाला बसमधुन न उतरता अमेरीकेत पोहचायचं आहे, इथंच तर आपल्या सगळ्यांचं घोडं पेंड खातं!
ही पॉझीटीव्ह थिकींग नाही, विशफुल थिंकींग आहे!
आधी थोडे पैसे जमवुन त्या बसमधुन बाहेर पड, पुण्या-मुंबईला ये,
मग काही वर्ष इथे जिद्दीने परीश्रम कर,
पैसे कमव, पैसे जमव,
एके दिवशी इंटरनॅशनल एअरपोर्ट पकडुन हव्या, त्या देशात मनसोक्त उड्डाण कर,

यासाठी काही महिने लागतील, किंवा काही वर्ष लागतील,

पण दिवसरात्र मनात घोळवलंस तर अमेरीकावारीचं स्वप्नं एक ना एक दिवशी पुर्ण जरुर होईल.

मनात मोठ्या स्वप्नांचं बीज पेरणं,

त्याला नियमित चांगल्या विचारांचं खतपाणी देणं,

आणि पैसे कमवण्यासाठी जीव तोडून मेहनत करणं,

हाच माझावाला ‘लॉ ऑफ अट्रॅक्शन’ आहे,

काही कृती न करता धो धो पैसे मिळवुन देणारा उपाय मला तरी अजुन सापडलेला नाही,

----------------------------------------------------------------------------------------------------------------
२. माणुस पैसा कमवत नसतो, सिस्टीम पैसा कमवुन देते. –

रोज तुम्ही नऊ ते सहा कामावर जाता,

किंवा व्यवसायात दहा ते दहा दुकानाचं शटर उघडुन लोकांना सर्व्हिस देता,

ह्याने तुमच्या मुलभुत गरजा पुर्ण होतील,

पण तुम्हाला गर्भश्रीमंत होवुन आयुष्याच्या प्रत्येक प्रांताची मनापासुन मजा लुटायची असेल, आणि ह्या जगात आगळं वेगळं व्यक्तिमत्व बनुन जगायचं असेल तर,

पैसे कमवण्यावर लक्ष देण्याऐवजी पैसे कमवुन देणार्‍या सिस्टीम उभा करण्यावर लक्ष द्या.

तुम्ही प्रत्यक्ष तिथे हजर नसलात तरी तुमच्याकडे पैशाचा ओघ सुरु असलाच पाहीजे,

त्यासाठी स्वतःला नियमित बचतीची सवय लावा,

पैशे पुरत नाहीत, खुप खर्च आहेत, असं काही सांगु नका,

संतुलित जीवनशैली ठेवा, अत्यावश्यक असेल, तिथंच खर्च करावा,

वायफळ एक रुपयासुद्धा नष्ट होवु देऊ नये,

माझं उत्पन्न महीना पाच हजार होतं, दहा हजार होतं, तेव्हाही मी नियमित बचत करायचो,

उलट तेव्हा तर बचतीची जास्त आवश्यकता असते,

ह्या बचतीच्या पैशांनी आर्थिक दृष्ट्या स्वतंत्र व्हा,

आणि कमीत कमी गुंतवणुकीतुन जास्तीत जास्त रेगुलर रिटर्न देणारी एक सिस्टीम उभी करा.

-----------------------------------------------------------------------------------------------------------------
३. टारगेट ठरवा. –

- पुढच्या एका वर्षात तुम्हाला किती रुपये हवे आहेत?

- एक रक्कम लिहा. मनातल्या मनात एक आकडा फिक्स करा.

- आता दररोज न चुकता व्यायाम, ध्यान आणि पैसे मिळाल्याचे व्हिज्वलायजेशन करा.

- लगेच एक कोटी रुपये प्रत्यक्ष मिळणार नाहीत,

- पण अनेक दिवसांच्या सातत्यानंतर एक कोटी रुपये मिळवण्यासाठी काय करावं लागेल, ह्याच्या नवनवीन आयडीया आपोआप रोजच सुचु लागतील.

- मनात आलेल्या कल्पना तात्काळ कागदावर उतरवा,

- आराखडा बनवा.

- अधुनमधुन आळशीपणा होईल, मन चंचल असते, त्याचे एवढे मनावर घेऊ नका.

- पुन्हा पुन्हा मनाचा व्हॅक्युम स्वप्नांनी भारुन टाका.

- सकाळ संध्याकाळ स्वप्नं मनात घोळवा.

- तुमच्या प्रार्थनेत जर तीव्रता, आर्तता आणि प्रामाणिकपणा असेल,

- तुम्ही ज्यांना भेटता किंवा भेटलाही नाहीत अशा सर्व लोकांबद्द्ल तुमच्या मनात जर काठोकाठ ओथंबुन भरलेले प्रेम असेल, तर ब्रम्हांडाला तुमच्या साऱ्या मागण्या पुर्ण कराव्याच लागतील.

शुद्ध विचार आणि नियोजनबद्ध, शिस्तबद्ध जीवनशैली ह्यांच्या जोरावर पुर्ण होणार नाही,
इतकी ‘मोठी’ औकात तर कुठल्याही स्वप्नाची नाही.

आभार आणि शुभेच्छा!...