MAHITI DARSHAN

 Home Remedies : रोगप्रतिकारक शक्ती वाढण्यासाठी आयुष मंत्रालयानं सांगितले घरगुती उपाय

महाराष्ट्र टाइम्स.कॉम | Updated: 02 Apr 2020, 10:57:42 PM

maharashtra-times

   

आयुष मंत्रालयाकडून (Ayush Ministry) आरोग्याची काळजी घेण्यासंदर्भात काही मार्गदर्शकतत्त्वे (Self Care Guidelines) जारी करण्यात आली आहेत. जेणेकरून नागरिकांना श्वसनासंबंधित जीवघेण्या आजारांपासून स्वतःचा बचाव करण्यास मदत मिळले. नागरिकांच्या आरोग्याची काळजी पाहता आयुष मंत्रालयाकडून काही आयुर्वेदिक औषधोपचारांचा सल्ला देण्यात आला आहे. कोणत्याही प्रकारच्या केवळ अफवांमुळे लोकांचा बळी जाऊ नये, यासाठी आयुष मंत्रालयाकडून खबरदारी घेण्यात आली आहे. अफवांना बळी पडू नका आणि शरीराची रोगप्रतिकारक शक्ती वाढण्यासाठी आयुर्वेदिक उपचार करा. आयुष मंत्रालयाकडून काही सामान्य पद्धती सुचवण्यात आल्या आहेत, ज्यांचा तुम्ही आपल्या दैनंदिन जीवनात सहजरित्या समावेश करू शकता. या उपचारांमुळे आपलं शरीर निरोगी राखण्यासाठी आणि रोगप्रतिकारक क्षमता वाढवण्यासाठी मदत होईल. जाणून घेऊया सोप्या उपचार पद्धती...

गरम पाणी प्या

undefined

दिवसभर भरपूर प्रमाणात पाणी प्या. साध्या पाण्याऐवजी गरमच पाणी प्यावे.

दिवसभरात कधीही कमीत कमी 30 मिनिटांसाठी योगासने, प्राणायाम आणि ध्यानधारणा करणे आवश्यक आहे.

हळद, जीरे, धने, लसूण यांचा स्वयंपाकामध्ये अवश्य समावेश करा.

अशी वाढवा रोगप्रतिकारक क्षमता

दररोज एक चमचा च्यवनप्राशचं सेवन करून दिवसाची सुरुवात करा. तुम्हाला मधुमेहाचा त्रास असल्यास शुगर फ्री च्यवनप्राशचे सेवन करावे. पण च्यवनप्राशनंच (chyawanprash) दिवसाची सुरुवात करावी.

(वाचा : डिप्रेशनमधून सुटका हवीय? ‘या’ 9 गोष्टी तुम्हाला करतील मदत)

हर्बल टी किंवा काढा

undefined

हर्बल टी किंवा औषधी काढ्याचं सेवन करा. यासाठी तुळस, दालचिनी, काळी मिरी, आले आणि मनुका एकत्रितरित्या पाण्यामध्ये उकळा. हे मिश्रण नीट उकळल्यानंतर एका ग्लासमध्ये गाळून घ्या. दिवसभरात या काढ्याचं तुम्ही एक किंवा दोन वेळा सेवन करू शकता. काढ्याची चव अतिशय तिखट वाटल्यास यामध्ये तुम्ही गुळ किंवा लिंबूच्या रसाचा समावेश करू शकता.

गोल्डन मिल्क

150 मिलिलीटर दुधामध्ये अर्धा चमचा हळद मिसळून तयार झालेले हळदीचं दूध Golden Milk) दिवसातून एक किंवा दोन वेळा प्या. हळदी दूध पिण्यापूर्वी किंवा प्यायल्यानंतर लगेचच कोणताही पदार्थ खाण्याची चूक करू नका.

(वाचा :रोगप्रतिकारक शक्ती वाढवण्यासाठी करा ही 5 योगासने)

आरोग्यासाठी लाभदायक विधि

undefined

गंभीर आजारांपासून आरोग्याचं संरक्षण करण्यासाठी काही सोप्या आणि आयुर्वेदिक पद्धतींची येथे माहिती आपण जाणून घेणार आहोत. आजारांना दूर ठेवण्यासाठी हे उपचार अतिशय प्रभावी आहेत.

प्रतिमर्श नष्य: (Pratimarsh Nasya)

तिळाचं तेल, नारळाचं तेल किंवा शुद्ध तूप आपल्या दोन्ही नाकपुड्यांना लावा. दिवसभरात हा उपाय दोन वेळा करा. सकाळी आंघोळ केल्यानंतर आणि रात्री झोपण्यापूर्वी हा उपाय करावा. या प्रक्रियेस प्रतिमर्श नष्य: (Pratimarsh Nasya) असे म्हणतात.

कवलग्रह (Oil Pulling Therapy)

एक चमचा तिळाचं तेल किंवा नारळाचं तेल मुखात घ्या आणि तेलाचा मुखामध्ये सर्व बाजूंना स्पर्श होऊ द्या. तेलानं गुळण्या करायच्या नाहीत, हे लक्षात असू दे. दोन ते तीन मिनिटांसाठी ही प्रक्रिया करावी. यानंतर तेल थुंकावं आणि कोमट पाण्यानं गुळण्या कराव्यात. तेल प्यायचं नाही, हे पण लक्षात ठेवा. दिवसातून एक किंवा दोन वेळा हा उपाय करावा. या प्रक्रियेस कवलग्रह नावानं ओळखले जाते.

(वाचा : काळजी घ्या ! हे आहेत जगातले 10 धोकादायक व्हायरस )

कोरडा खोकला आणि घशातील वेदनेवर उपाय

undefined

पुदिन्याची पाने आणि ओवा एकत्रितरित्या पाण्यामध्ये उकळा. या पाण्यानं वाफ घ्या. यामुळे तुमचा खोकला-सर्दीचा त्रास कमी होईल.

तुम्हाला कफ किंवा घशामध्ये तीव्र वेदना होत असल्यास लवंग पावडर, मध किंवा साखर असे मिश्रण तयार करा आणि दिवसातून दोन किंवा तीन वेळा या मिश्रणाचे सेवन करा.

या गोष्टी लक्षात ठेवा

सामान्य सर्दी-खोकल्याचा त्रास झाल्यानंतर किंवा घशामध्ये वेदना जाणवू लागल्यानंतर हे उपाय केले जातात. या उपचारानंतरही तुम्हाला आराम मिळत नसेल तर तातडीनं डॉक्टरांकडे जाऊन तपासणी करून घ्या.

वरील सर्व माहिती देशातील नामांकित आयुर्वेदाचार्यांकडून देण्यात आलेली आहे. तुम्ही तुमच्या आवश्यकतेनुसार हे उपचार करू शकता. बदलत्या हवामानानुसार होणाऱ्या आरोग्यासंबंधित आजारांविरोधात लढण्यासाठी आणि रोगप्रतिकारक क्षमता वाढवण्यासाठी या उपचारांमुळे तुम्हाला मदत मिळेल. करोना व्हायरसवरील उपाय म्हणून या औषधोपचार प्रक्रियांकडे पाहू नका. तुम्हाला श्वसनासंबंधीचे कोणतेही तीव्र स्वरुपातील त्रास जाणवू लागल्यास तातडीनं डॉक्टरांचा सल्ला घ्या.