🏵 शनिप्रदोष 🏵

           शनिवारी त्रयोदशी आल्यास त्याला शनिप्रदोष म्हणतात. या शुभ दिनी शिवार्चन करुन शनीदेवास प्रिय असलेले तीळ दान करावे. शिव शनीची आदिदेवता असल्याने तीळाच्या तेलाने परमेश्वराची आराधना केली असता शनीदेवाच्या बाधेपासून निवृत्ती होते. शनिवारी प्रदोष समयी शिवाराधना केल्यास समस्त कर्म दोषरहित होऊन आपणांस सुख शांती लाभते. शनी ही कर्मकारक देवता आहे. शिव ही संहारक देवता आहे. शनीप्रदोष समयी शिवाची आराधना, सर्व प्रकारच्या अशुभ कर्माच्या महापापांचे भस्म करून शुध्द नूतन, दिव्य, तेजोमय शुभ स्पंदनाने मानवाचे मन , बुध्दी, अहंकार, चित्त यांची आत्मशुध्दी करून नवीन जन्म प्राप्त करून देते.

            अशा प्रकारच्या अर्चनेने शनीदेव शांत होतात. शनिवारी रात्रीच्या वेळी, त्या जीवाचे सारे दुष्कर्म, दोषाची अधिष्ठान देवता महाकालीमध्ये विलीन होतात. दुसऱ्या दिवशी म्हणजे रविवारी सूर्योदयाच्या समयी सवित्र मंडळातील मध्यवर्ती असलेल्या त्या महाशक्तिचा भक्ताला अनुग्रह प्राप्त होतो. याचवेळी त्याच्या नूतन जीवनाची सुरूवात होते. त्यांच्या अशुभ कर्माच्या पापाचे गाठोडे परमेश्वराच्या योगाग्नीत जाळले जाते.