MAHITI DARSHAN

  

*नाम माझा मित्र...*

*उत्तम मित्र मिळणे हे फार मोठे भाग्य होय.*

*खरा मित्र तोच की,*

*जो सुखाच्या व दु:खाच्या दोन्ही प्रसंगी आपणाला साथ करतो.*

*नाहीतर सुखाच्या समयी जवळ असणारे मित्र,*

*दुःखाच्या प्रसंगी मात्र आपले तोंड लपवितात,*

*असाच सामान्य अनुभव असतो.*

*म्हणूनच इंग्रजीत एक उत्कृष्ट म्हण आहे की,*

*Friend in need is a friend indeed.*

*नामस्मरण करणाऱ्या साधकाला,*

*भगवन्नाम हा एक उत्कृष्ट मित्र आहे,*

*असा अनुभव येतो.*

*पृथ्वीच्या पाठीवर कोठेही,*

*अगदी निर्जन अशा प्रदेशात जरी असला तरी,*

*नामधारकाला एकलेपणा जाणवत नाही.*

*कारण...*

*नाम हा मित्र आपणाला सर्व काळी,*

*व सर्व स्थळी सतत साथ करीत असतो.*

*जेथे जातो तेथें तू माझा सांगाती ।*

*धरूनी हाती चालविसी।।*

*नामस्मरण करताना,*

*आपण एकटे आहोत असे जरासुद्धा वाटत नाही.*

*परीक्षित राजाला,*

*दंश करणारा भला मोठा तक्षक सर्प,*

*सूक्ष्म रूप धारण करून,*

*लहानशा बोरात बसून होता,*

*त्याप्रमाणे सर्वव्यापक परमात्मा,*

*अत्यंत सूक्ष्म स्वरूपात,*

*नामात वास करून राहतो.*

*चौदा भुवनें जया पोटीं।*

*तो राहे भक्ताचिये कंठी।।*

*नामाचा सहवास जसाजसा वाढू लागतो,*

*तसातसा नामात प्रभुचा वास आहे,*

*याची नामधारकाला अधिकाधिक प्रचीती येऊ लागते.*

*त्याचप्रमाणे नामस्मरण जसे जसे अधिक होऊ लागते,*

*तसे तसे नामाचे सान्निध्य गोड वाटू लागते.*

*नामाशी चाललेला हा एकांत,*

*मोडूच नये असे साधकाला तीव्रतेने वाटते.*

*लोकांचा सहवास टाळण्याकडे वृत्ती होऊन,*

*नामाचा सहवास वाढविण्याकडे प्रवृत्ती बळावू लागते.*

*जन्मभर नाम साथ देते इतकेच नव्हे,*

*तर मृत्यूच्या बांक्या समयी सुद्धा,*

*ते नामधारकाचा त्याग करीत नाही.*

*किंबहुना नामाचे खरे महत्त्व,*

*आणि माहात्म्य त्याच वेळेस अनुभवास येते.*

*याचसाठी केला होता अट्टाहास।*

*शेवटचा दिवस गोड व्हावा।।*

*ज्याचे सर्व आयुष्य गोड असते,*

*त्याचा शेवटचा दिवस सुद्धा गोडच होतो;*

*परंतु ज्याचे आयुष्य रडण्यात,*

*दुखण्यात,काळजीत किंवा चिंतेत गेले,*

*त्याचा शेवटचा दिवस गोड होणेच शक्य नाही.*

*अखंड नामस्मरण करणारा नामधारक,*

*हा सुख-दुःखाच्या पलीकडे जाऊन,*

*स्वरूपी स्थिर झालेला असतो.*

*आनंदस्वरूप अशा नामाच्या सहवासात,*

*तो आनंदाची दीपावली नित्य साजरी करीत असतो.*

*विठोबाचे राज्य आम्हां नित्य दीपवाळी।।*

*देहावर जरी मृत्यूची सावली पडली,*

*तरी सुद्धा हा शांत असतो.*

*याचे कारण नामरूपाने राम जवळ असतो,*

*व साधकाला मृत्यूचा जरासुद्धा,*

*उपसर्ग होणार नाही,*

*याची पूर्ण काळजी घेतो.*

*इतकेच नव्हे तर मृत्यूनंतर सुद्धा,*

*नाम साधकाला सोडीत नाही.*

*एका जनार्दनी सर्व नाशिवंत।*

*एकची शाश्वत हरिनाम।।*